మసాలా దినుసులు వంటలకు మంచి రుచిని అందించడమే కాకుండా, మన శరీర ఆరోగ్యానికి కూడా ఎంతో దోహదపడతాయి. వీటిల్లో మిరియాలు ముఖ్యమైనవి. అయితే వీటిలో వివిధ రకాలు ఉన్నాయి. నలుపు, తెలుపు మిరియాలు.. ఇలా రెండు రకాలుగా ఉంటాయి. అయితే వీటిల్లో ఏది ఆరోగ్యానికి మేలు చేస్తుందో చాలా మందికి తెలియదు.
నల్ల మిరియాలు సాధారణంగా వేడి స్వభావంతో రుచికి కారంగా ఉంటాయి. కానీ తెల్ల మిరియాలు నల్ల మిరియాలు కంటే తేలికపాటి, రుచి కొంచెం భిన్నంగా ఉంటాయి. ఇందులో కారం అంతగా ఉండదు. అందుకే వీటిని క్రీములు, సూప్‌లు, వైట్ సాస్‌ల వంటి తేలికపాటి వంటకాలకు ఉపయోగిస్తారు.
నల్ల మిరియాలు పచ్చిగా ఉన్నప్పుడు చెట్టు నుంచి తొలగిస్తారు. వీటిని ఎండలో ఎండబెట్టి నిల్వ చేస్తారు. వాటి బయటి చర్మం నల్లగా, ముడతలు పడి ఉంటుంది. ఈ ప్రక్రియ దాని రుచిని తీవ్రతరం చేస్తుంది ఘాటు వాసనను ఇస్తుంది.
తెల్ల మిరియాలు పూర్తిగా పండిన ఎర్ర మిరియాలు. వీటిని నీటిలో నానబెట్టి వాటి బయటి తొక్కలను తొలగిస్తారు. తర్వాత మిగిలిన విత్తనాన్ని ఎండబెట్టాలి. ఇది మృదువైన ఆకృతిని, సున్నితమైన వాసనను ఇస్తుంది. నల్ల, తెల్ల మిరియాలు రెండింటినీ ఒకే చెట్టు నుంచి సేకరించినా ఈ విధమైన ప్రక్రియ వల్ల నల్లగా, తెల్లగా కనిపిస్తాయి. అలాగే రుచి కూడా భినంగా ఉంటుంది.
నల్ల మిరియాలు ముదురు రంగులో ముడతలు పడిన బాహ్య భాగాన్ని కలిగి ఉంటాయి. వాటి రంగు కారణంగా సులభంగా గుర్తించబడతాయి. తెల్ల మిరియాలు మృదువైన, లేత ఉపరితలం కలిగి ఉంటాయి. నల్ల మిరియాలు వంట చేయడానికి సరైనది. దీన్ని ఉపయోగించడం వల్ల వంటల రుచిని పెంచుకోవచ్చు. గరం మసాలా తయారీలో ఉపయోగించే ప్రధాన సుగంధ ద్రవ్యాలలో ఇది కూడా ఒకటి. తెల్ల మిరియాల్లో పెద్దగా రుచి ఉండదు. తెల్ల మిరియాలు సాధారణంగా లైట్ కలరింగ్ కోసం ఉపయోగిస్తారు. అందుకే దీనిని సూప్‌లులో ఉపయోగిస్తారు.
