భారత క్రికెటర్ యుజ్వేంద్ర చాహల్, ధనశ్రీ వర్మ విడాకులు ప్రస్తుతం సోషల్ మీడియాలో హాట్ టాపిక్‌గా మారాయి. 2020లో వివాహం చేసుకున్న ఈ జంట, గత 18 నెలలుగా విడివిడిగా జీవిస్తున్నట్లు తెలుస్తోంది. విడాకుల కేసు విచారణలో ఉండగానే, చాహల్ పేరు మరోసారి వార్తల్లోకి ఎక్కింది. ఆర్జే మహవాష్‌తో డేటింగ్ చేస్తున్నట్లు గాసిప్‌లు వస్తుండగా, ధనశ్రీ ఎమోషనల్ రియాక్షన్ ఇచ్చింది. బుధవారం ముంబైలో జరిగిన అభిషేక్ బచ్చన్ నటించిన బి హ్యాపీ సినిమా స్క్రీనింగ్‌కి ధనశ్రీ హాజరైంది. ఈ ఈవెంట్ అనంతరం ఆమె మీడియాతో మాట్లాడింది. మెరూన్, తెలుపు రంగు కో-ఆర్డ్ సెట్లో స్టైలిష్‌గా మెరిసిన ఆమె, చాలా సంతోషంగా ఫోటోగ్రాఫర్లతో మాట్లాడింది. అయితే, ఆమె ముఖంలో కొంత ఆలోచనాత్మకమైన భావం కనిపించింది.
ఇన్‌స్టాగ్రామ్‌లో షేర్ చేసిన ఓ వీడియోలో ధనశ్రీ, “నేను చాలా భావోద్వేగానికి గురయ్యాను” అని వ్యాఖ్యానించింది. ఈ మాటలు వినగానే అభిమానులు ఆమె మనస్థితిని గమనించి, విడాకుల ప్రక్రియలో ఆమె ఎదుర్కొంటున్న మానసిక ఒత్తిడికి ఇది నిదర్శనమని భావించారు.
ఈ ఘటనకు ముందు ధనశ్రీ తన ఇన్‌స్టాగ్రామ్ స్టోరీలో, “మహిళలను నిందించడం ఎల్లప్పుడూ ఫ్యాషన్‌లో ఉంటుంది” అని రాసిన మెసేజ్‌ను షేర్ చేసింది. ఈ పోస్ట్ ఆదివారం జరిగిన ఛాంపియన్స్ ట్రోఫీ ఫైనల్ తర్వాత వచ్చింది.
ఆ మ్యాచ్‌లో యుజ్వేంద్ర చాహల్, ప్రముఖ ఆర్జే మహవాష్‌తో కలిసి కనిపించాడు. ఇది అభిమానుల మధ్య కొత్త చర్చకు దారి తీసింది. చాహల్ కొత్తగా డేటింగ్ చేస్తున్నాడా? అన్న ప్రశ్నలు విస్తృతంగా వ్యాపించాయి. దీంతో, ధనశ్రీ పెట్టిన రహస్య పోస్ట్ చాహల్‌పై వ్యంగ్యంగా ఉందని అనేక మంది భావించారు.
ధనశ్రీ ఈ పోస్ట్ ఎందుకు పెట్టిందనే దానిపై రెండు విభిన్న అభిప్రాయాలు ఉన్నాయి. కొందరు ఇది చాహల్ కొత్త డేటింగ్ వార్తలపై ఆమె స్పందన అని అనుకుంటున్నారు. మరికొందరు, ఆమె తనపై జరుగుతున్న ట్రోలింగ్‌కు ఇదో సమాధానం అని చెబుతున్నారు. విడాకుల ప్రకటన చేసినప్పటి నుండి ధనశ్రీపై సోషల్ మీడియాలో పెద్ద ఎత్తున ట్రోలింగ్ జరుగుతోంది. చాలా మంది అభిమానులు ఆమెను నెగెటివ్‌గా చూస్తున్నారు, మరికొందరు ఆమెను సపోర్ట్ చేస్తున్నారు.
ఇటీవల, ధనశ్రీ వర్మ తన మాజీ భర్త యుజ్వేంద్ర చాహల్ నుండి రూ. 60 కోట్లు జీవనభృతి (అలిమనీ)గా కోరినట్లు వార్తలు వచ్చాయి. అయితే, ఇది పూర్తిగా పుకారు మాత్రమే అని ఆమె కుటుంబ సభ్యులు వెల్లడించారు.
మరిన్ని క్రీడా వార్తల కోసం ఇక్కడ క్లిక్ చేయండి..
