SRH vs GT, IPL 2025: ఐపీఎల్ 18వ సీజన్‌లో భాగంగా 19వ మ్యాచ్ సన్‌రైజర్స్ హైదరాబాద్ వర్సెస్ గుజరాత్ టైటాన్స్ మధ్య కీలక మ్యాచ్ జరగనుంది. ఏప్రిల్ 6న జరగనున్న ఈ మ్యాచ్ రాజీవ్ గాంధీ ఇంటర్నేషనల్ స్టేడియంలో రాత్రి 7:30 గంటలకు మొదలుకానుంది. విజయంతో ఐపీఎల్ 2025 సీజన్ ఆరంభించిన సన్‌రైజర్స్ హైదరాబాద్.. వరుసగా మూడు మ్యాచ్‌ల్లో ఓడిపోయింది. దీంతో పాయింట్ల పట్టికలో అట్టడుగున, అంటే 2 పాయింట్లతో 10వ స్థానంలో నిలిచింది. మరోవైపు, తొలి ఓటమి తర్వాత వరుసగా రెండు మ్యాచ్‌ల్లో గెలిచిన గుజరాత్ టైటాన్స్ పాయింట్ల పట్టికలో టాప్-5లో నిలిచింది. ఇటువంటి సందర్భంలో, సన్‌రైజర్స్ హైదరాబాద్ తమ సొంత మైదానంలో అద్భుతంగా ప్రదర్శన ఇవ్వడం ద్వారా ట్రాక్‌లోకి తిరిగి రావాలని కోరుకుంటుండగా, గుజరాత్ టైటాన్స్ తమ విజయ పరంపరను కొనసాగించాలని కోరుకుంటోంది.
కోల్‌కతాతో జరిగిన గత మ్యాచ్‌లో మొహమ్మద్ షమీ తొలి ఓవర్‌లోనే వికెట్ తీసి హైదరాబాద్‌కు మంచి ఆరంభం ఇచ్చాడు. దీంతో ఈసారి కూడా షమీ నుంచి భారీ అంచనాలను మేనేజ్‌మెంట్ కలిగి ఉంటుంది. గుజరాత్ కెప్టెన్ శుభ్‌మాన్ గిల్, జోస్ బట్లర్‌లపై షమీ టీ20ల్లో అద్భుతమైన గణాంకాలను కలిగి ఉన్నాడు. షమీ ఐదు ఇన్నింగ్స్‌లలో రెండుసార్లు గిల్‌ను అవుట్ చేయగా, ఈ కాలంలో గిల్ 114 స్ట్రైక్ రేట్‌తో షమీ బౌలింగ్‌లో 41 పరుగులు మాత్రమే చేయగలిగాడు. షమీ 13 ఇన్నింగ్స్‌లలో బట్లర్‌ను మూడుసార్లు అవుట్ చేయగా, బట్లర్ 134 స్ట్రైక్ రేట్‌తో అతనిపై 107 పరుగులు చేశాడు.
పవర్‌ప్లేలో హైదరాబాద్ పేలవ ప్రదర్శన..
తొలి మ్యాచ్ తర్వాత హైదరాబాద్ టాప్ ఆర్డర్ వరుసగా విఫలమవుతోంది. ఈ సీజన్‌లో ఇప్పటివరకు పవర్ ప్లేలో అత్యధిక వికెట్లు కోల్పోయిన జట్టుగా హైదరాబాద్ నిలిచింది. అంటే ఇప్పటి వరకు జరిగిన 4 మ్యాచ్‌ల్లో హైదరాబాద్ జట్టు పవర్ ప్లేలో 10 వికెట్లు కోల్పోయింది. ఓపెనింగ్ జోడీ ట్రావిస్ హెడ్, అభిషేక్ శర్మ గత సీజన్‌తో పోలిస్తే సగటు భారీగా తగ్గింది. హెడ్, అభిషేక్ జోడీ 49.9 సగటుతో పరుగులు సాధించగా, ఈ సీజన్‌లో ఈ జోడీ కేవలం 18.8 సగటుతో చెత్త రికార్డును సొంతం చేసుకుంది. ఇటువంటి పరిస్థితిలో, హెడ్, అభిషేక్ జోడీ త్వరలోనే తమ పాత ఫాంలోకి తిరిగా రావాలని కోరుకుంటోంది.
ఇవి కూడా చదవండి
కిషన్, క్లాసెన్‌లకు విలన్‌లా రషీద్ భాయ్..
రషీద్ ఖాన్‌కు హైదరాబాద్‌లో ఆడిన అనుభవం చాలా ఉంది. హైదరాబాద్ బ్యాటింగ్ ఆర్డర్ భారం ఇప్పటివరకు ప్రధానంగా హెన్రిచ్ క్లాసెన్ భుజాలపై ఉంది. కాబట్టి గుజరాత్ టీం క్లాసెన్‌పైనే ఫోకస్ చేయవచ్చు. రషీద్ ఐదు టీ20 ఇన్నింగ్స్‌లలో రెండుసార్లు క్లాసెన్‌ను అవుట్ చేశాడు. కానీ, ఈ సమయంలో క్లాసెన్ రషీద్‌పై 149 స్ట్రైక్ రేట్‌తో 58 పరుగులు చేశాడు. రషీద్ 10 టీ20 ఇన్నింగ్స్‌లలో ఇషాన్ కిషన్‌ను ఔట్ చేశాడు. అయితే, ఈ సమయంలో కిషన్ 119 స్ట్రైక్ రేట్‌తో రషీద్‌పై 76 పరుగులు చేశాడు. మొదటి మ్యాచ్‌లో కిషన్ సెంచరీ చేశాడు. కానీ, ఆ తర్వాత ప్రత్యేకంగా ఏమీ చేయలేకపోయాడు.
హైదరాబాద్ vs గుజరాత్ హెడ్ టు హెడ్ రికార్డులు (SRH vs GT Head to Head Records)..
ఐపీఎల్‌లో ఇప్పటివరకు సన్‌రైజర్స్ హైదరాబాద్, గుజరాత్ టైటాన్స్ 5 సార్లు తలపడ్డాయి. ఈ మ్యాచ్‌ల్లో గుజరాత్ టైటాన్స్ జట్టు ఆధిక్యంలో ఉంది. గుజరాత్ టైటాన్స్ సన్‌రైజర్స్ హైదరాబాద్‌ను 3 మ్యాచ్‌ల్లో ఓడించగా, ఒక మ్యాచ్‌లో ఓటమి పాలైంది. ఇరుజట్ల మధ్య జరిగిన ఒక మ్యాచ్ రద్దు అయింది. ఇప్పుడు రెండు జట్లు హైదరాబాద్‌లోని రాజీవ్ గాంధీ అంతర్జాతీయ స్టేడియంలో రెండోసారి తలపడనున్నాయి.
SRH vs GT మ్యాచ్ పిచ్ రిపోర్ట్..
సన్‌రైజర్స్ హైదరాబాద్ (SRH), గుజరాత్ టైటాన్స్ (GT) మధ్య రాజీవ్ గాంధీ అంతర్జాతీయ స్టేడియంలో జరుగుతుంది. ఇది బ్యాటింగ్‌కు అనుకూలమైనదిగా పరిగణిస్తున్నారు. అయితే, మ్యాచ్ ముందుకు సాగుతున్న కొద్దీ, స్పిన్నర్లకు కూడా సహాయం లభిస్తుంది. మొదటి కొన్ని ఓవర్లలో ఫాస్ట్ బౌలర్లకు కొంత సహాయం లభించవచ్చు.
ఇప్పటివరకు, హైదరాబాద్‌లోని రాజీవ్ గాంధీ అంతర్జాతీయ స్టేడియంలో మొత్తం 79 ఐపీఎల్ మ్యాచ్‌లు జరిగాయి. ఇందులో, మొదట బ్యాటింగ్ చేసిన జట్టు 35 మ్యాచ్‌ల్లో విజయం సాధించగా, రెండో ఇన్నింగ్స్‌లో బ్యాటింగ్ చేసిన జట్టు 44 మ్యాచ్‌ల్లో విజయం సాధించింది. ఇక్కడ టాస్ గెలిచిన జట్టు 29 మ్యాచ్‌ల్లో గెలవగా, ఓడిన జట్టు 50 మ్యాచ్‌ల్లో గెలిచింది. ఇక్కడ అత్యధిక జట్టు స్కోరు 286/6లు కాగా, ఇది 2025లో రాజస్థాన్ రాయల్స్‌పై సన్‌రైజర్స్ హైదరాబాద్ సాధించింది.
రెండు జట్లు..
సన్‌రైజర్స్ హైదరాబాద్ – ట్రావిస్ హెడ్, అభిషేక్ శర్మ, ఇషాన్ కిషన్, నితీష్ కుమార్ రెడ్డి, హెన్రిచ్ క్లాసెన్ (కీపర్), అనికేత్ వర్మ, అభినవ్ మనోహర్, పాట్ కమిన్స్ (కెప్టెన్), సిమర్జిత్ సింగ్, హర్షల్ పటేల్, మహ్మద్ షమీ, సచిన్ బేబీ, జయదేవ్ ఉనద్కత్, ఆషాన్ అన్సదర్, రాహుల్ ఎమ్ జడ్కత్, వి. కమిందు మెండిస్, అథర్వ తయాడే, ఇషాన్ మలింగ.
గుజరాత్ టైటాన్స్- శుభమన్ గిల్ (కెప్టెన్), జోస్ బట్లర్ (వికెట్ కీపర్), సాయి సుదర్శన్, షారుఖ్ ఖాన్, రాహుల్ తెవాటియా, రవిశ్రీనివాసన్ సాయి కిషోర్, అర్షద్ ఖాన్, రషీద్ ఖాన్, కగిసో రబడ, మహ్మద్ సిరాజ్, ప్రసిద్ కృష్ణ, షెర్ఫాన్ రూథర్‌ఫోర్డ్, గ్లెన్త్ రథర్‌ఫోర్డ్, గ్లెన్త్ రథర్‌ఫోర్డ్, వాషింగ్టన్ సుందర్, జయంత్ యాదవ్, మహిపాల్ లోమ్రోర్, కరీం జనత్, కుల్వంత్ ఖేజ్రోలియా, గెరాల్డ్ కోయెట్జీ, మానవ్ సుతార్, కుమార్ కుషాగ్రా, గుర్నూర్ బ్రార్, నిశాంత్ సింధు.
మరిన్ని ఐపీఎల్ వార్తల కోసం ఇక్కడ క్లిక్ చేయండి..
