
కూరగాయల కంటే ఆకు కూరలు ఆరోగ్యానికి చాలా మంచివని పోషకాహార నిపుణులు చెబుతుంటారు. ఆకు కూరలు తేలిగ్గా జీర్ణం అవుతాయి. పైగా ఆకుకూరల్లో పోషకాలు సమృద్ధిగా నిండివుంటాయి కాబట్టి.. నిత్య జీవితంలో శరీరం ఎదుర్కొనే వివిధ రకాల అనారోగ్య సమస్యలను ఆకు కూరలతో చెక్ చెప్పవచ్చు. అందుకే వారంలో కనీసం 3 సార్లు ఆకు కూరలు తప్పకుండా తినమని సూచిస్తున్నారు. ఈ ఆకు కూరల్లో ముఖ్యమైంది మెంతికూర.
మెంతికూరలో ఉండే కాల్షియం, మెగ్నీషియం, విటమిన్ డి, ఫైబర్ కారణంగా ఆరోగ్యం మెరుగుపడుతుంది. ముఖ్యంగా గుండె ఆరోగ్యాన్ని కాపాడుతుంది. శరీరంలో ఉండే చెడు కొలెస్ట్రాల్ సులభంగా కరుగుతుంది. ఇందులో ఉండే ఫైబర్ కారణంగా వారంలో రెండు సార్లు మెంతి కూర తినడం వల్ల జీర్ణక్రియ మెరుగుపడుతుంది.
అజీర్తి, కడుపు నొప్పి, గ్యాస్ సమస్యలతో బాధపడేవారికి మెంతికూర అద్భుతంగా పనిచేస్తుంది. ఇందులో ఫైబర్ పెద్దమొత్తంలో ఉండటం వల్ల కడుపు నిండినట్టు ఉంటుంది. దాంతో బరువు తగ్గించేందుకు అద్భుతంగా ఉపయోగపడుతుంది. అంతేకాకుండా మధుమేహం వ్యాధిగ్రస్థులకు మెంతి కూర దివ్యౌషధంగా భావిస్తారు.
మెంతి కూరలోని పోషకాలు శరీరంలోని విష పదార్ధాలను బయటకు పంపించడంలో దోహదం చేస్తాయి. దాంతో చర్మం ఆరోగ్యంగా ఉంటుంది. ఇందులో ఉండే పోషకాలు చర్మంపై ముడతల్ని దూరం చేస్తాయి. చర్మాన్ని యౌవనంగా ఉంచుతాయి. స్వభావరీత్యా మెంతి కూర వేడి చేస్తుంది. అందుకే వారంలో రెండు సార్లు చాలు.
ఆయుర్వేద వైద్యంలో మెంతి ఆకులకు చాలా ప్రాధాన్యత ఉంది. రక్తంలో చక్కెర స్థాయిని మెంతి ఆకులు అద్భుతంగా తగ్గిస్తాయి. టైప్ 2 డయాబెటిస్ వ్యాధిగ్రస్థులకు చాలా బాగా పనిచేస్తుంది. శరీరంలో హార్మోన్ బ్యాలెన్స్ చేయడంలో మెంతికూర అద్భుతంహగా పనిచేస్తుంది. పీరియడ్స్ సమస్యల్లో కూడా మెంతికూర ఉపశమనం కల్గిస్తుంది.