2025 ఛాంపియన్స్ ట్రోఫీలో పేలవ ప్రదర్శన చేసిన పాక్ జట్టు.. ప్రస్తుతం న్యూజిలాండ్‌తో 5 మ్యాచ్‌ల T20 సిరీస్‌ ఆడుతోంది. ఈ సిరీస్‌లో పాకిస్తాన్ జట్టుకు సల్మాన్ అలీ కెప్టెన్‌గా వ్యవహరిస్తున్నాడు. బాబర్ ఆజామ్, మహమ్మద్ రిజ్వాన్ లాంటి సీనియర్ ప్లేయర్స్ లేకుండానే బరిలోకి దిగిన పాకిస్తాన్ జట్టు.. ఈసారి కూడా అట్టర్ ప్లాప్ అయింది. క్రైస్ట్‌చర్చిలోని హాగ్లీ ఓవల్‌లో న్యూజిలాండ్‌తో జరిగిన తొలి మ్యాచ్‌లో పాకిస్తాన్ బ్యాటింగ్ పేక ముక్కలా కుప్పకూలింది. మొత్తం జట్టు 100 పరుగులు కూడా చేయలేకపోయింది.
ఈ మ్యాచ్‌లో న్యూజిలాండ్ జట్టు టాస్ గెలిచి ముందుగా బౌలింగ్ వేసింది. అది సరైన నిర్ణయం అని కాసేపటికే రుజువైంది. పాకిస్తాన్ జట్టు తొలి ఓవర్ నుంచే పేలవ ప్రదర్శన కనబరిచింది. ఆ జట్టు ఓపెనర్ మహ్మద్ హారిస్ తొలి ఓవర్లోనే 6 బంతుల్లో ఖాతా కూడా తెరవకుండానే ఔటయ్యాడు. దీని తర్వాత, మరో ఓపెనర్ హసన్ నవాజ్ కూడా ఖాతా తెరవలేకపోయాడు. ఆ తర్వాత ఇర్ఫాన్ ఖాన్ రూపంలో పాకిస్తాన్‌కు మూడో దెబ్బ తగిలింది. అతను కూడా కేవలం 1 పరుగు మాత్రమే చేయగలిగాడు. దీంతో మొదటి 3 ఓవర్లలో కేవలం 3 పరుగులు మాత్రమే చేసి 3 వికెట్లు కోల్పోయింది.
ఆ తర్వాత, స్కోరు 11 పరుగులకు చేరుకునే సమయానికి పాకిస్తాన్ నాలుగో వికెట్ కోల్పోయింది. షాదాబ్ ఖాన్ రూపంలో పాక్‌కు మరో షాక్ తగిలింది. అనంతరం, సల్మాన్ అగా, ఖుస్దిల్ షా మధ్య పార్టనర్‌షిప్ చిన్నచిన్నగ బిల్డప్ అవుతుండగా.. కెప్టెన్ సల్మాన్ అగా 18 పరుగులు చేసి పెవిలియన్‌కు చేరాడు. మరోవైపు, ఖుస్దిల్ షా 32 పరుగులు చేసి ఈ ఇన్నింగ్స్‌లో అత్యధిక పరుగులు సాధించిన ఆటగాడిగా నిలిచాడు. అతనితో పాటు, జహందాద్ ఖాన్ 17 పరుగులు చేశాడు. అయినప్పటికీ పాకిస్తాన్ జట్టు 18.4 ఓవర్లలో 91 పరుగులు చేసి ఆలౌట్ అయింది.
22 పరుగులు జోడించేలోపు 8 వికెట్లు..
ఈ ఇన్నింగ్స్‌లో పాకిస్తాన్ కూడా 8 వికెట్లు కోల్పోయి 22 పరుగులు జోడించింది. నిజానికి, పాకిస్తాన్ తొలి 4 వికెట్లు కేవలం 11 పరుగులకే పడిపోయాయి. ఆ తర్వాత చివరి 4 వికెట్లు 11 పరుగులు మాత్రమే జోడించగలిగాయి. ఆశ్చర్యకరమైన విషయం ఏమిటంటే ఈ ఇన్నింగ్స్‌లో న్యూజిలాండ్ 3 క్యాచ్‌లు వదిలివేసింది, అయినప్పటికీ పాకిస్తాన్ 100 పరుగుల కంటే తక్కువకే ఆలౌట్ అయింది. ఇది కాకుండా, న్యూజిలాండ్‌లో పాకిస్తాన్ సాధించిన అత్యల్ప స్కోరు కూడా ఇదే.
జాకబ్ డఫీ- కైల్ జామిసన్ విధ్వంసం
ఈ ఇన్నింగ్స్‌లో న్యూజిలాండ్ తరపున జాకబ్ డఫీ, కైల్ జామిసన్ విధ్వంసం సృష్టించారు. జాకబ్ డఫీ 3.4 ఓవర్లలో 14 పరుగులు ఇచ్చి 4 వికెట్లు పడగొట్టాడు. అదే సమయంలో, కైల్ జామిసన్ 4 ఓవర్లలో కేవలం 8 పరుగులు మాత్రమే ఇచ్చి 3 వికెట్లు తీశాడు. ఇష్ సోధి 2 వికెట్లు, జాకరీ ఫౌల్క్స్ 1 వికెట్ సాధించారు.
