ఈ ట్రంపు కంపు.. ఇప్పట్లో వదిలేలా లేదు. మన విద్యార్ధుల భవితవ్యాన్ని ప్రశ్నార్థకంగా మారిన ట్రంప్ విధానాలకు అమెరికన్లలోనూ వ్యతిరేకత వ్యక్తమవుతోంది. చిన్న చిన్న కారణాలతోనే వీసాలను రద్దు చేస్తుంటే అక్కడి సెనెటర్లకే చిర్రెత్తిపోతోంది. అమెరికా ఫస్ట్ సరే.. ఎకనామీ బూస్టప్‌గా ఉన్న విదేశీయులపై ఎందుకింత దాష్టీకం అన్నది అమెరికా సమాజం నుంచి వస్తున్న ప్రశ్న. అయినా సరే ట్రంపు పట్టించుకోవడంలేదు. F1 వీసాలను అడ్డదిడ్డంగా కోత పెడుతున్నాడు. మరి మన విద్యార్ధుల అమెరికా కష్టాలు తీరే మార్గమే లేదా…?
అమెరికాలో F-1 విద్యార్థి వీసాల రద్దు వ్యవహారం తీవ్ర విమర్శలను ఎదుర్కొంటోంది. అంతర్జాతీయ విద్యార్థులపై కఠినమైన ఇమ్మిగ్రేషన్ విధానాలను అమలు చేస్తూ, ట్రంప్ పరిపాలన విద్యార్ధుల జీవితాలతో ఆటలాడుకుంటోదని..యుఎస్ సెనెటర్లు ఆగ్రహం వ్యక్తం చేస్తున్నారు. వీసా రద్దు అంతర్జాతీయ విద్యార్థుల విద్యా స్వాతంత్ర్యాన్ని హరించడమే కాదు..అమెరికాను అంతర్జాతీయంగా దోషిగా నిలబెట్టే ప్రమాదంలోకి నెడుతోందని సెనేటర్లు ఆందోళన వ్యక్తం చేస్తున్నారు.
అమెరికా అద్యక్షుడు ట్రంప్ ఎగ్జిక్యూటివ్ ఆర్డర్స్‌తో F-1 విద్యార్థి వీసాల రద్దు వేగవంతమైంది. జాతీయ భద్రత, చట్టవిరుద్ధ కార్యకలాపాల నియంత్రణ అన్న సాకుతో F-1వీసాలపై ఆంక్షలను విధించింది. దీంతో అనేకమంది యుఎస్ సెనెటర్లు వీసా రద్దును తీవ్రంగా వ్యతిరేకిస్తున్నారు. విదేశీ విద్యార్ధులు.. ముఖ్యంగా ఇండియన్ స్టూడెంట్స్ అమెరికా యూనివర్శిటీల్లో సాంస్కృతిక వైవిధ్యాన్ని, అకడమిక్ ప్రతిష్టను పెంచుతున్నారని, వారిని లక్ష్యంగా చేసుకోవడం విద్యా వ్యవస్థను బలహీనపరచడమేనన్నది సెనేటర్ల వాదన. అమెరికన్ సివిల్ లిబర్టీస్ యూనియన్.. ACLU వీసా రద్దును చట్టవిరుద్ధమంటూ ట్రంప్ నిర్ణయాన్ని తప్పుబడుతోంది. దీర్ఘకాలంలో అమెరికా సాఫ్ట్ పవర్, ఆర్థిక వృద్ధిపై ప్రభావం చూపుతుందని హెచ్చరించారు. సరైన ఆధారాలు లేకుండా ఏకపక్ష నిర్ణయాలతో అమెరికా వీసాలను రద్దు చేస్తోందని మండిపడుతున్నారు సెనెటర్లు.
చిన్న చిన్న నేరాలకే అమెరికా విద్యార్ధుల వీసాలను రద్దు చేస్తోంది. ట్రాఫిక్ ఉల్లంఘనలతో పాటు చిన్న నేరాల ఆధారంగా వీసాలను రద్దు చేయడం అన్యాయమని సెనెటర్లు వాదిస్తున్నారు. మన ఆంధ్రప్రదేశ్‌కు చెందిన విద్యార్థి అధిక వేగంతో కారు నడిపినందుకు వీసా రద్దు నోటీసు అందుకున్నాడు. అయితే డ్రైవింగ్ లైసెన్స్ లేకుండా కారు తోలాడన్నది పోలీసుల అభియోగం. ఇలాంటి చిన్న చిన్న కారణాలతో ఇప్పటివరకు 150మందికి పైగా వీసాలను రద్దు చేసింది అమెరికా.
విదేశీ విద్యార్దులతో యూనివర్శిటీలకు గణనీయమైన ఆదాయం అందుతోంది. 2023లో 7,000 మంది భారతీయ విద్యార్థులు వీసా గడువు ముగిసినా అమెరికాలోనే ఉండిపోయారని కొన్ని నివేదికలు చెబుతున్నాయి. అయినా సరే ఈ విద్యార్ధులు యూనివర్శిటీలకు ఆర్థికంగా వెన్నుముకగా నిలిచారని అవే నివేదికలు గణాంకాలతో సహా నిరూపించాయి. అలాంటి భారతీయ విద్యార్థులపై వివక్ష చూపడం ఎంతవరకు సబబన్నది అమెరికా సమాజం నుంచే వస్తున్న ప్రశ్న. ఇదే కొనసాగితే భవిష్యత్‌లో ద్వైపాక్షిక సంబంధాలపై ప్రభావం చూపే ప్రమాదం ఉంది. అయితే కొందరు విద్యార్థులు వీసా రద్దును సవాలు చేస్తూ న్యాయస్థానాలను ఆశ్రయిస్తున్నారు.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..
